السلام عليكم

[chemist_2005]

الى طلبة سنة اولى جميعا
نصيحة من اخ اكبر ليكم
ان اردتم النجاح والتفوق فى الكلية
التزام فى حضور المحاضرات
التزام فى مذاكرة المحاضرة فورا خلال اسبوع على الاكثر
مبقولكمش عقدوا نفسكم لكن لو مشتوها اولويات صدقونى هتنبسطوا وترتاحوا كتير
اولويات بمعنى
احضروا المحاضرة وبعد كدة ممكن تقعدوا مع زمايلكم فى جنينة الكلية لو حبيتم او تروحوا وتتسلم باى تسلية مفيدة
من حيث المذاكرة نفس الشىء
خلوا دائما فية بريك بين كل جزء من المذاكرة والاخر
بجد اتمنى لكم جميعا التوفيق
والله ولى التوفيق
شكرا

[smsma smsm]

شكررررررررررررررا جدا على النصائح دية بس انا كنت عايزة اعرف طريقة المداكرة ازاى و منين

[chemist_2005]

بصى ياستى تذاكرى منين دى انا عارف انها بتبقى مشكلة فى البداية
لكن لما تقرى الكلية كدة وتحسى انك بقيتى خبرة هتلاقى ان الموضوع بسيط
بصى كل دكتور هتحضريلة هيكون لية اسلوبة المعين اللى عاوزك تذاكريلة منة
فية دكتور هيديلك كتاب تشترية وتذاكرى منة
وفية واحد تانى هيبقى عاوزك تذاكرى من المحاضرة مباشرة لان امنتحاناتة بتيجى منها على طول
وفية واحد تالت بينزل مذكرات خاصة بية فى المكتبة وبتصوريها
وفية واحد رابع ممكن يعمل كل دة ويسيبك تحتارى
انا بقولك متحتاريش ياستى
وخليكى فى المختصر المفيد علشان متتعبيش نفسك وتلفى وتدورى والكلية مش محتاجة تضييع وقت على الفاضى
بصى لو منزل مذكرات تصوريها من المكتبة صوريها فورا
لكن محاضرتك اللى حضرتيهالة تكون عندك الاساس بالعناوين الرئيسية علشان مفيش حاجة تقع منك لانهم ساعات كتير بيقولوا كلام فى المحاضرة ومبيكتبهوش فى الورق علشان يضمنوا حضورك للمحاضرات
عموما الموضوع بسيط باذن الله
واى حاجة محتاجاها انا تحت امرك بجد
والله ولى التوفيق
شكرا

[Deema]

ألف شكر ليك ..
والله أنا محتاسه في الكليه ومش عارفه اذاكر .. وحاجات كتييييير مش فاهماها
وعندنا كويز 1 يوم الاتنين في chimestry وأنا مش فاهمه فيه حاجه ..
وحآسه إني حآخد (0 ) بجدااااااره ,
ربنا يستر ..

[The DeViL]

شكرا يا كميست على مجهوداتك
و ديما ف سنة اولى بيبقى الواحد قلبه خفيف كدة و خايف من كل حاجة
و دة شعور طبيعى ان الواحد يبقى مش فاهم اى حاجة ف الترم الاول من سنة اولى
بس لازم تشدو حيلكم
و اهم حاجة المحاضرة و فككم من اى حاجة بعد كدة

[chemist_2005]

الشكر لله يا جميل
دعوة حلوة منك افضل شكر
ربنا يوفقنا جميعا

[جانا]

شكرا جدا بس انا خايفة جدا منzoologyالعملى ربنا يستر انا قلقانة جدا منه والرسومات بتاعت الضفدعة دى بجد بنساها بسرعة ياريت تقولولى اذاكره ازاى

[chemist_2005]

اهلا وسهلا صديقتى العزيزة جانا
لا تقلقى من مادة الحيوان اطلاقا
مادة لذيذة وهتحبيها باذن الله
بالنسبة للامتحان ذاكرى الرسومات اللى انتى بتاخديها كل سيكشن من المعيدين هيجبلكم رسمة او اتنين فى الامتحان من اللى ادهلكم فى السيكشن
وكمان فية امتحان ديمونستراشن وكمان تشريح
المهم اعملى اللى عليكى والباقى على ربنا
وزى ماقلت لزمايلك فوق متقلقيش تماما امتحان اخر الترم هو اللى علية اكبر درجات
المهم تجمعى اكبر قدر ممكن فى الامتحانات الصغيرة دى
بس الاهم خللى بالك من الضفدعة وخدريها كويس علشان متنطش فى وشك زى ما حصل زمان ايام ما كنت فى سنة اولى مع واحدة زميلتى بالكلية نست تحط كمية مناسبة من الكحول
وربنا يوفقك بالخير كلة يا جانا
ابقى سمعينى اخبار خير عنك دايما يا قمر
بالتوفيق

[mona higazy]

انا مش فاهمة اى حاجة فى الorganic ساعدونى بليز انا معرفتش اكتب اى حاجة فى المحاضرات لانى مش فاااااااااااااااهمة المشكلة تقريبا انى كان عندى ظروف ومحضرتش اول محاضرة

[جانا]

شكرا جدا وان شاء الله حذاكر الروسومات بس ياريت تدعيلنا نتخرج من الكلية دى

[chemist_2005]

مرحب بيكى يا منى
الكيمياء العضوية ايضا بسيطة
محضرتيش اول محاضرة يبقى ممكن تصوريها من اى حد من زميلاتك اللى حضروا المحاضرة
او تصوريها من المكتبة ورق الكورسات
او حاولى تعرفى العناوين الرئيسية اللى اتخدت فيها وذاكرى من الكتاب
والله ولى التوفيق

[jellly]

ايوه يا جماعه احضروا المحاضرات و جيبوا الورق من المكتبه عشان الورق بيفهم اكتر.. و الامتحانات اغلبها من المحاضرات و بالنسبه لمواد التخصص اللي ما بينزلهاش ورق لااازم تحضروا المحاضرات!



و على فكره الضفده بتتسلم متخدره

[jellly]

الضفدعه*