مشهد من مسلسل مصرى

[waleed A.Hassan]

الضابط : مالك يابنى ، سقعان ولا أيه ؟
المتهم الشاب : الجو برد شوية يا باشا !
الضابط ينهض من مكتبه ويقوم بتشغيل مدفأة كهربية ،
الضابط : كويس كده ؟!
المتهم : تمام كده يا باشا .. ألف شكر ،
الضابط ( وهو يخرج علبة سجائر ) : تاخد واحدة مارلبورو ولا مش بتدخن ؟!!
المتهم : بادخن يا باشا ،
الضابط ( يعطيه سيجارة ويقف ويقترب منه ليشعلها له ) : خلى بالك ديه مستوردة ، وجايبها من برة ، يعنى معليهاش صورة الجدع العيان ،
يضحكان ،
المتهم : ألف شكر يا باشا ،
الضابط : قهوتك أيه ؟!
المتهم : والله مالوش لزوم يا باشا .. أنما لو ضرورى يعنى ، يبقى مظبوط سعادتك !
الضابط يمسك سماعة التيلفون ويطلب قدحان من القهوة ،
الضابط : أتغديت ؟!!!
المتهم ( غير مصدق نفسه ) : لا يا باشا كتر ألف خيرك ، ده كتير والله .. أنا الحمد لله أتغديت من شوية ، ربنا يخليك ياباشا ، ده سيادتك فى قمة الذوق والله !!!!!
الضابط : أمال يابنى كنت فاكرنا وحوش ، أحنا أخواتكم يا أستاذ تامر ، بس للأسف الصحافة والتليفزيون هما اللى مخليين سمعتنا وحشة فى نظركوا ، ما علينا .. ندخل بقى فى الموضوع ، أنت طبعا ً عارف أنت هنا ليه ؟!
المتهم ، لا الحقيقة يا باشا أنا معرفش ،
الضابط : يعنى أنت متعرفش أنت متهم بأيه ؟
المتهم : الحقيقة يا باشا أنا مش فاهم حاجة ، إحنا كنا بنحرق علم إسرائيل ، راحوا الجماعة المخبرين قابضين علينا ،
الضابط : يعنى أنت مش عارف هما قبضوا عليك ليه ؟!!
المتهم : لا والله يا باشا ، أحنا كنا بنعبر عن مشاعرنا ضد الأجرام الأسرائيلى اللى حصل على أخواننا الفلسطينين فى غزة ، ده أحنا ولا مشينا فى مظاهرة وهتفنا ضد الحكومة ولا عملنا حاجة من ديه !!
الضابط : وبفرض يا سيدى أنكم هتفتوا ضد الحكومة .. من حقكم أنكم تعبروا عن رأيكم طالما محصلش أى تخريب أو تعطيل للمسيرة الوطنية ، ده شئ من حقك ومن حق كل مواطن ،
المتهم ( مندهشا ً ) : أمال قبضتوا علينا ليه يا باشا ؟!
الضابط ( مبتسما ً ) : لأنك مبلغتناش أننا نيجى نحميكم ونحرق العلم معاكم يا أستاذ تامر ، مش أحنا وطنيين زيكم ، ونفسنا نعمل زيكم ونحرق أعلام أعداء الوطن معاكم ،
المتهم ( غير مصدق نفسه ، وتذرف الدموع من عينيه ) : معقول يا باشا كلام سيادتك ، أنا مش مصدق ، يعنى أنا مش متهم يا باشا ؟!!!
الضابط : مين يقدر يتهمك يا أستاذ تامر ، أنت راجل وطنى ،
المتهم : يعنى أقدر أمشى يا باشا !!!
الضابط : أنت مشيت فعلا ً يا تامر ، وأنا هوصلك بنفسى ، وهاجيبلك عربية توصلك لحد البيت ، وأسفين على العطلة ،
يبكى المتهم بشدة ويرتمى فى أحضان الضابط ، ويبكى الضابط من فرط الوطنية ، ثم يهتفان : تحيا جمهورية مصر العربية ،
ثم تظهر خلفهما صورة ضخمة للسيد الرئيس .

[dina_m7]

ده ممكن يكون حلم او امنيه لكن مينفعش حتى يكون مسلسل لانه فاقد المصداقيه خالص الا بقى لو كان خيالى

[The DeViL]

لالا دى ممكن تكون حقيقة فعلا
بس اعتقد وليد نسى يقول اول القصة
وانا حاولت اخمنها يعنى ممكن تكون اولها كدة مثلا
((الضابط : تعالى يلااا يابن التيييييييييت
المتهم( و بكل ثقة و سخرية ) : اقرا الكارت دة كدة يا حضرة الظابط
الضابط ( مرتعدا ) : انا اسف يا حبيبى مكنتش اعرف انك ابن ...... بااشاا مدير جهاز الـ........))
و بعد كدة نكمل باقى القصة عادى جدا و هنلاقيها واقعية فعلا
واحب اقولك يا وليد ( منك لله )

[Roxanne]

loool hwa fe kda ?! i dun think so

nice post, thankies