إزاي تستعدي لعمل مقابلة شخصية؟!

[dina_m7]

قاعدة في البيت ولابيكي ولا عليكي وفجأة ضرب جرس التليفون وجات لك المكالمة اللي مستنياها من زمان...

ألوو.. أيوه من فضلك يا ريت تشرفينا علشان اتحدد لك يوم الإثنين علشان تعملي مقابلة شخصية مع المدير المسؤول ....

أكيد ساعتها فرحتي وبعد شوية قعدتي بينك وبين نفسك تفكري يا ترى تعملي إيه؟! وتلبسي إيه؟!وتتصرفي إزاي؟!

وطبعا في الوقت ده محتاجة أي حد يساعدك ويجاوبك على كل الأسئلة اللي بتدور في دماغك...شوفي يا قمر لازم في الأول تشوفي هتلبسي إيه لأن بيني وبينك كده مش أي لبس ينفع تلبسيه وأنت رايحة... مش كده وبس ده أنت لازم تهتمي بكل التفاصيل التانية الصغيرة قبل الكبيرة زي إكسسوارك اللي هتلبسيه وماكياجك وحاجات تانية كتير وده لأن نجاح المقابلة الشخصية بيعتمد بنسبة 70 % على مظهرك ولبسك وعلشان كده عايزاكي تهتمي بنفسك وبمظهرك اللي هتكوني بيه...

طبعا دلوقتي أنت احترتي أكتر بس متخافيش أنا هقولك دلوقتي واحدة واحدة ازاي تهتمي بمظهرك..
أولا:بالنسبة للبس

أكيد طبعا مش أي لبس عندك في الدولاب ينفع تروحي بيه المقابلة الشخصية دي وده لأن المقابلة الشخصية بتحتاج لملابس رسمية زي مثلا "بدلة كاملة" عبارة عن "بنطلون وجاكيت" أو "تايير" عبارة عن "جاكيت وجوب" أو طقم عبارة عن "جوب" عليها "بلوزة كلاسيك" أو "جاكيت" أو "بنطلون كلاسيك" وعليه "بلوزة كلاسيك" أو" جاكيت كلاسيك"...

وطبعا مش محتاجة أقولك إنك ما تحاوليش تفكري إنك تلبسي جينز نهائي لأنه مش مناسب في المقابلات اللي زي دي.



وبخصوص الألوان اللي المفروض تختاريها في البدلة اللي هتلبسيها فهي..




الأسود وممكن تكسري حدة اللون الأسود بإنك تلبسي تحت الجاكيت بلوزة أو بادي أبيض أو موف

وخدي بالك لازم تبعدي في اختياراتك عن الملابس اللي فيها أي لمعة أو تطريز، وتبعدي كمان عن الملابس المفتوحة يعني من الآخر كده اختاري ملابس حشمة لأن زي ما قلنا ملابسك هي اللي هتدي الانطباع عنك وعن شخصيتك

طبعا أنت عارفة إن الشنطة والحذاء لازم لونهم يكون مناسب للون الطقم اللي هتلبسيه أو على الأقل تلبسي حذاء وشنطة لونهم "أسود" لأن اللون الأسود بيليق على كل اللبس..

وابعدي نهائي عن الحذاء والشنطة اللي لونهم ذهبي لأنهم غير مناسبين في المواقف اللي زي دي..كمان ابعدي عن الأحذية الرياضية لأنها هي كمان مش مناسبة.
وخدي بالك لازم تهتمي بنظافة الحذاء كويس قبل ما تدخلي للمقابلة الشخصية دي، ويفضل دايما إن الحذاء اللي هتلبسيه يكون مقفول من قدام ومن وراء وغير مفتوح.

ولازم تلبسي شراب طويل واوعي تلبسي شراب صغير لأنه بيكون مش مناسب وأفضل ألوان الشرابات المناسبة في الوقت ده هو "الأسود" أو"البيج".

مش عيب إنك تلبسي إكسسوارات في المقابلة دي بس العيب إنك تكتري من الإكسسوارات دي أو إنك تلبسي إكسسوارات بأحجام كبيرة علشان كده يا ريت وأنت بتختاري إكسسوارات تختاريها بسيطة جدا وتكون عبارة عن كوليه بسيط أو سلسلة صغيرة وخاتم ويكون حجمهم صغير وابعدي عن الاكسسوارات اللي فيها ألعاب تعمل صوت وأنت بتحركي إيدك ومش محتاجة أقولك إن لون الإكسسوارات دي لازم يكون مناسب للون اللبس اللي أنت هتلبسيه..

رابعا:بالنسبة لتسريحة الشعر أو الحجابشوفي يا قمر لو كنت مش محجبة يبقى ماتحاوليش تفردي شعرك في اليوم ده ويا ريت تلميه أو تعمليه ديل حصان..

لكن لو كنت محجبة يبقى ماتحاوليش تلبسي أكتر من طرحتين مع بعض وخدي بالك إنك تختاري الطرح أو الإيشاربات اللي ألوانها هادية وتكون في نفس الوقت مناسبة للون لبسك وابعدي نهائي عن الطرح أو الإيشاربات اللي فيها تطريز كتير.


طبعا مش محتاجة حد يقولك إنك لو كنت هتحطي ماكياج يبقى خلي ماكياجك خفيف وبلاش تكتري منه وكفاية قوي إنك تحطي "روج لونه بني وكحل أسود أو أزرق...

وبالنسبة للبارفان يفضل برضه إنه يكون خفيف وبلاش البارفان المركز ويا ريت ما تحطيش مانيكير لأن فيه ناس كتير مش بتحبه وممكن ده يكون سبب لا قدر الله في إنك ما تتقبليش في الوظيفة دي.

لازم تهتمي بنظافة بشرتك ونظافة ملابسك ونظافة أظافرك ونظافة أسنانك وفمك لأنهم كمان بيدوا انطباع عنك..
زي ما مظهرك مهم جدا كمان تصرفاتك أثناء المقابلة الشخصية دي مهمة جدا وهي اللي هتساعد على الحكم عليكي علشان كده هقولك دلوقتي على الحاجات اللي مفروض تاخدي بالك منها أثناء المقابلة دي وهي..


الوصول في الميعاد


لازم تعملي في حسابك أنك توصلي بدري قبل ميعادك بحاولي ربع ساعة على الأقل لأن ده هيدي انطباع كويس عنك بإنك إنسانة ملتزمة في مواعيدها... لكن ولو حدث أي أمر ما عارض واضطريتي تتأخري يبقى المفروض تعملي تليفون تعتذري فيه وتوضحي سبب التأخير.

اقفلي موبايلك


اوعي تنسي قبل ما تدخلي تقفلي موبايلك لأن مش من الإتيكيت إن موبايلك يرن أثناء إجراء المقابلة الشخصية.

خلي عندك ثقة في نفسك


حاولي أن تصرفاتك تخلي اللي قدامك يحس إن عندك ثقة بنفسك ودي هتبان من خلال طريقة جلوسك وكلامك علشان كده عايزاكي أثناء المقابلة تقعدي وتفردي ضهرك وأنت بتتكلمي خلي راسك مرفوعة لفوق وبصي في عين اللي بيكلمك لأن كل التصرفات دي هتخلي اللي قدامك يحس إن عندك ثقة في نفسك..

كمان خلي دايما الابتسامة على وشك وماتحاوليش تبيني إن أعصابك مشدودة وخليكي دايما عندك ثقة في نفسك وفي قدراتك.

عدم الضحك بصوت عال


خدي بالك إن مش من الإتيكيت إنك تضحكي بصوت عال أثناء المقابلة الشخصية،وإذا حدث أي شيء مضحك يبقى اكتفي فقط بابتسامة خفيفة..

بلاش تمضغي لبان


لو كان معاكي لبانة يبقى المفروض ترميها قبل ما تدخلي لأن مش من الإتيكيت إنك تمضغي لبان أثناء المقابلة الشخصية لأنها بتخلي اللي قدامك يشعر إنك مش مهتمة بيه.



بلاش كدب


يا ريت تجاوبي على كل الأسئلة اللي بتتعرض عليكي بصدق ومن غير كدب لأن لو ظهر إنك كدبتي فده هيدي انطباع سيئ عنك.



اتكلمي عن أعمالك السابقة


لو كان سبق لك واشتغلتي قبل كده في مكان تاني يبقى اتكلمي عن نجاحاتك اللي حققتيها في عملك السابق وإيه اللي كان نفسك تحققيه واوعي تتكلمي عن عملك السابق بطريقة مش كويسة أو إنك تعرضي المساوئ اللي كانت فيه لأن ده هيدي انطباع سيئ عنك بإنك غير كتومة لأسرار عملك.



اسألي عن طبيعية الوظيفة


مش عيب إنك في نهاية المقابلة تسألي عن طبيعية العمل اللي المفروض هتقومي بيه؟!

[chemest man]

و يا عيني بقه بعد ما تعمل كل ده يجي الاستاذ المسئول و يقولها سوري واضح انك مش مناسبه تبقي ايه في الجووووووووووون

[dina_m7]

وقتها حيبقى نصيبها كده يا كيمست هى حتبقى عملت اللى عليها والباقى على ربنا ........thanks 4 your reply

[ola mohamed]

بجد شكرا ليكي
دا انتي ما سبتيش حاجة

[dina_m7]

ميرسى لذوقك يا علا وميرسى لردك

[Trouble Maker]

الموضوع فعلا حيوي والكلام مبدئيا عجبني بس انتي نسيتي اهم حاجة انتي اتكلمتي عن المظهر وهو اهم حاجة بس سطحيا لان صلب الموضوع هو الاسلوب ف الاسئلة والحواروالاسئلة الروتينية الي بتتكرر ف ل مقابلة لازم تكون ع الاقل عارفة حترد ازاي

[WISHES]

طب ياترى و هى قعدة تحط رجل على رجل كثقة و لاتنزلهم كاحترام مثلا
و شكرا لموضوعك و سورى ردى جه متاخر

[jellly]

!!! انا من رايي دي مبالغه شديده جدا جدا.....في كل حاجه..