الشخصيه المغناطيسيه

[dina_m7]

سمعت مصطلح الشخصيه المنغاطيسيه ده قبل كده ؟؟

طيب انت بتشوف حواليك شخصيات محبوبه جدا اتمنيت تكون زيهم ؟؟ تفتكر هما اتولدوا كده ؟؟

اكيد لا طبعا بس هما عندهم صفات الناس كلها بتحبها ومفيش جدال ف كده فبالتالى بيعتبروا شخصيات معناطيسيه لكل اللى حواليهم

طيب الصفات دى ايه عشان نكون زيهم ؟؟ هما 20 صفه .....تعالوا نعرف هما ايه ؟


1-الزم الابتسامة المشرقة (فهى بوابتك لكسر الحاجز الجليدي مع من حولك ).

2- عليك بكلمة الثناء الصادقة ( جامل ولكن دون نفاق أو مراء).

3- ابتعد عن الجدال (فالجدال طريق لعناد الطرف الآخر ).

4- تعامل مع الآخرين كما ترغب أن يعاملوك .

5- التمس لغيرك الأعذار (دوماً قدم لهم الأعذار وابتعد عن العتاب ).

6-لا تغضب مهما كان السبب (فالغضب من الشيطان ).

7- سلم على كل من تقابله سواء تعرف اولا تعرف (فالسلام الصادق هو سبيلك نحو خطب ود أى شخص ).

8-تهادوا تحابوا (هادي من حولك ولو بأقل القليل فالهدية لها مفعول سحري رائع على الغير ).

9- تعلم كيف تنصت (فالآخرين يحبون دوماً من يسمعهم ).

10-فكر بنفس مرحة (انشر حولك التفاؤل والأمل دوماً وابتعد عن التشاؤم).

11- لا تكن كالذبابة (كن خفيفاً دوماً في كل شيء فلا تزيد ولا تنقص).

12-اجعل الآخرين يظنون دوماً أن الفكرة فكرتهم(اعطهم انطباع أن ما اقترحته أو تفكر به هم أيضا شركاء فيه.

13-تواضع مع الكل (فالطبيعة البشرية تنفر دوماً من المغرور والمتعالي).

14-تعلم أن تسامح دائماً (ادفع بالقول الطيب تجبر من أمامك على أن يوقرك ).

15-لا تقف في طابور أصحاب النصائح (وجه ما تريد ولكن بصورة تجعل من أمامك لا ينفر منك ).

16-كن مع الآخرين في السراء قبل الضراء (شاركهم الأحزان والافراح ).

17- تعلم ألا تنتقد الآخرين (فالحديث يزول ويبقى أثره في العقل الباطن ).

18-لا تضحك كثيراً فى غير المواقف التى تحتاج ذلك (فالضحك فى بعض الأحيان يفقد المهابة والوقار ).

19- تعلم أن تكون حليماً صبوراً (فهما صفتان يحبهما الله ).

20 – كن كالنحلة (تقف على كل زهرة فتأخذ منها رحيقها دون أن تؤذها ).


بس كده حاجات بسيطه وسهله واى حد فينا يقدر يعملها وخصوصا الناس اللى بتحس انها مش عارفه تتعامل مع اللى حواليها

ويارب الموضوع يكون عاجبكم

[waleed A.Hassan]

ردا ً على بعض النقط :-
1 / لا أبتسم سوى لسبب قهرى ، وإن أبتسمت .. فأنها تكون خارجة من الفم وليس القلب ، وليس معناها نفاق ، ولكن لم تستطع الأبتسامة الخروج من الباب الحديدى للقلب ، فأستعوضعها بالفم ،
2 / الشئ الذى يجب أن أعطى رأيى فيه يكون بالأنتقاد اللاذع وليس الثناء والمجاملة ، لأنى أرى أن الشئ الذى يستحق الثناء هو شئ واجب فعله ، وليس عمل أضافى ، ينبغى أن أثنى عليه ،
3 / قاعدة شرحها الدكتور أبراهيم الفقى تقول أن المتجادلان دائما ً ما ينتهى الجدال بينهما بضرب رؤسهم فى حائط واحد ، ولا يصلا لشئ ،
وأنا أول من لا يطبق هذه القاعدة ،
5 / ألتمس العذر فى حدود العذر ، ولا أقبله ممن تعدى هذه الحدود ،
6 / للأسف .. أغضب بشكل كبير ، ولكنى أعتقد أنى لست سريع الغضب ،
8 / لا أهادى أحد ، فلست ممن يحبون جو المناسبات التى تسلم فيها الهدايا ،
10/ أنا الأكتئاب .. والأكتئاب أنا ،
14 / أتسامح فى حدود التسامح ، وهى نادرة ، وأدفع بالقول الصحيح - من وجهة نظرى على الأقل - ولا يهمنى القول الطيب ، فالصحيح يحقق غاية الصحة والطيبة ،
17 / أنتقد .. وبشدة ، مادمت أقبل نقد الأخرين ،
18 / لا أضحك ،
19 / الصبر من ألد أعدائى ،
وشكرا ً يا دينا على الموضوع الجميل ،

[The DeViL]

شكرا دينا على الموضوع
و الشخصية الى بالشكل دة بتبقى جميلة فعلا
وللعضو وليد / مش للدرجة, انت احسن من كدة على فكرة

[HaMaDa]

أولا: شكرا يا دينا على الموضوع بجد هايل اوى اوى
ثانيا: انا اولا مرة اسمع عن الشخصية المغناطيسية دية
ثالثا وده الاهم
----------
شايف لية نفسك كدة يا وليد , واضح من كلامك انك حاد جدا مع اى حد متعرفهوش وبتحب ترسم لنفسك شخصية
الشخصية يا وليد مش انك تبقى كدة

[dina_m7]

thanks 4 all replys
بعد اذنك يا وليد عندى تعليق على كلامك وانا اسفه مقدما لو كلامى حيكون حاد معاك شويه ده لان ردودك ف اكتر من موضوع دلت بشكل كبير جدا على شخصيتك
انا مش عارفه ليه انت عامل ف نفسك كده ؟؟ انت ليه ديما متشائم ؟؟ ليه مش مستمتع بحياتك حرام عليك بجد والله انت لسه صغير اوى عشان تعمل ف نفسك كده لسه حتشيل مسئوليات كتير بعد كده عيش حياتك واستمتع بيها على اد ما تقدر
وكمان انت ليه مصمم على طريقتك دى وشايف انها صح جدا رغم انها مش مقبوله خالص يعنى الابتسامه فيها ايه عشان تبقى بالنسبالك صعبه اوى كده هوة انت مريت بحياه قاسيه جدا فتكرهه حياتك ولا ايه ؟؟
بص مهما كنت اللى مريت بيه هوة ايه فانت قادر انك تغيير نفسك وتغيير طريقتك احنا كلنا عايشين مرة واحده ف الدنيا دى ولازم نخليها اجمل حياه ممكنه احنا مش حنعيش تانى
يا وليد انت جواك طاقه هايله حتخليك تغيير كل حاجه ف دنيتك بس الاهم من ده انك تكون فعلا عايز تغيير نفسك وتعترف ان طريقتك دى غلط اعمل كل حاجه بتفرح ف حياتك وابعد عن كل اللى بيدايقك كل حاجه ف ايديك فعلا
وكمان واضح انك من المهمتمين بالاستاذ ابراهيم الفقى يبقى حاول تستفيد بكلامه ونمى شخصيتك وغيرها للاحسن وانت اللى ف الاول وف الاخر مستفيد والله
انا اسفه جداااااااااا على تدخلى ف حياتك واسفه على التطويل جدا

[The DeViL]

احب اعمل مداخلة بسيطة بعد اذنكم احيى فيها دينا على انها فعلا لماحة جدا
و قدرت تعرف وليد من مجرد كتابة
بس هو ممرش بحياة قاسية ولا حاجة الراجل لسة جايب موبايل جديد (( يعنى عايش حياة كويسة ))
و فعلا عرفتى توجهى النصيحة الى انا معرفتش اوجهاله ( او وجهتهاله كتير و مسمعش كلامى ) مع أننا صحاب جدا
و عايز اقولكم ان وليد فيه حاجات جميلة كتير بس هو ديما مهموم بالدنيا كدة و شايل هموم مش بتاعته ولا المفروض يفكر فيها حاليا
و احب اسمع تعليق وليد على كلام دينا ,,

[dina_m7]

تعليقا على رد ديفل
اولا ميرسى جدا لذوقك بس كنت عايزة اوضح حاجه انا مكنش قصدى باللفظ حياه قاسيه انها تكون من الناحيه الماديه انا كان قصدى حياته الاسريه مثلا او موقف مر بيه واثر ف حياته او اى حاجه شبه كده
ثانيا للمرة التانيه انا اسفه يا وليد والله بس صدقنى انا قولتلك كده عشان مصلحتك

[waleed A.Hassan]

ردا ً على الديفل : شكرا ً يا مروان على مداخلتك الأولى ، وعلى التسييح اللى فى التانية .. مش ناقص غير أنك تقول أحنا أكلنا أيه النهاردة ،
ردا ً على حمادة : مش حاد جدا ً ولا حاجة يا حمادة ، ربما أنت أستنتجت كده ،
ردا ً على دينا : من غير أسف يا دينا ، كلنا فى المنتدى ده أخوات ، وأشكرك على التحليل النفسى الجميل اللى عملتهولى ، بس أنا والله مش شايف أن أنا صح ولا حاجة ، ولا أنا مريت بحياة قاسية - سواء مادية أو أسرية أو شخصية - بس ممكن أستخدم كلام مروان ، مع حذف كلمة حاليا ً ،
ردا ً على الجميع : يمكن يا جماعة تشوفونى مكتئب أو متشائم ، بس أنا عاوز أقول حاجة .. يمكن الأنسان يختار الشئ اللى بيفكر فيه ، أنما للأسف مفيش حد بيختار الشئ اللى بيحس بيه ، لأن الأحساس غير قابل للتفكير أو أن أحنا نطبق عليه قواعد منطقية ، ألا فى حالات نادرة ، ربما أنتوا بتقولوا كده علشان أنتوا متفائلين ، أو مقبلين على الحياة ،
بس على فكرة .. أنا عادى يعنى مش مزودها ولا حاجة ، ومش الصورة اللى أنتوا رسمتوها ، وفيكم واحد يعرفنى كويس ويقدر يتكلم عنى فى الموضوع ده ،
يا جماعة ده فيه ناس بتنتحر بسبب الأكتئاب والتشاؤم ، وطبعا ً دينا هتحلل كلامى وتقولى أنت دلوقتى لسة مكتئب صغير ، بكرة الأكتئاب هيكبر معاك ، وتوصل لمرحلة أنك تفكر فى الأنتحار ،
أطمنوا ... أنا على يقين أن الدنيا أتفه من كده ، والواحد مش هيبقى عاش حياة سودا ، وتبقى أخرته هى كمان سودا ،
جزيل الشكر ليكم كلكم ، وأسف على التطويل

[dina_m7]

اولا انا مكنش قصدى احللك نفسيا ولا حاجه كل الموضوع انى حبيت اساعدك تخرج من المود ده
ثانيا وانت ليه مش مقبل على الحياه ومتفائل زينا ؟؟ دى مش قضيه يعنى توقع ديما الخير وخليك متاكد ان كل حاجه بايد ربنا وربنا عمره ما حيعمل حاجه وحشه ليك
ثالثا انت مزودها جدااااااااا ومفيش حاجه ف الدنيا تستاهل ده بما انها تافهه زى مانت بتقول
رابعا وده الاهم ان اللى تعبك ف حياتك هوة مجرد احساس وعلى فكرة دى حاجه كمان ممكن تتغير لانه مجرد شعور زيه زى العصبيه ممكن تتحكم فيها وده لي صله بالعقل الباطن واللى اكيد الاستاذ ابراهيم الفقى اتكلم فيه
واخيرا احب اكررلك انا مش بحللك نفسيا ولا حاجه انا حبيت اساعدك وبس لاننا اخوات زى ماقولت وانا محبش اشوف اخويا عامل ف نفسه كده

[waleed A.Hassan]

جزيل الشكر لدينا ، وأوعدكم جميعا ًَ أنى هحاول ،
والله يا جماعة أنا حاسس أن الموضوع بقى أسمه ( شخصية وليد ) ، مش الشخصية المغناطيسية ،
وعلى فكرة يا دينا لو هتلاحظى ، أن المواضيع بتاعتك بتسجل أكبر نسبة ردود ، وده لأن مواضيعك ديناميكية ، قابلة لأنها تتمط وتتفرع بشكل كبير تحت العنوان الرئيسى ،
فى أستمرار أن شاء الله ،

[dina_m7]

ميرسى جدا لذوقك يا وليد وياريت تنفذ وعدك لينا وربنا يوفقك

[HaMaDa]

بجد ياريت تكون استفدت من كلامنا كلنا يا وليد ومتنساش اننا كلنا اخوات
وبجد لو غيرت من نفس زى مبتقول هحس ان المنتدى حقق هدف وبقى ليه قيمة

[AMR ABD EL.HAKIM]

والله العظيم يا جماعة أنا بقرأ الردود وبضحك جدا لأن هذا الموضوع من أكثر المواضيع الذى أمتاز بكبر حجم الرد وعلى شئ أعتقد أنه ميستهلش لأن لو جيت بصيت من بعيد جدا هتلاحظ أنك صعب تحكم على شخصية عن طريق وسيلة زى النت لأن النت فى حد زاته غبى عقلانى زى الكمبيوتر بالضبط مش هيوصلك نوياك ولا جمال روحك ولا ولا ولا .....وهتلاحظ أن كثير ما يتحدثون على النت يمجدون أو يرسمون شخصيات حتى لو سألت نفسك فى يوم بتقول على النت ده كله حوارات فعشان كده بقلكم متحكموش على شخصية عن طريق النت ولا حتى بالكلام لأن مش شرط أن الكلام يمثل شخصية المتحدث ومش هو ده وليد حبيبى وسلامى لكل أصدقائى وزمايلى العلومنجية .

[waleed A.Hassan]

قولهم يا حاج عمرو عشان مش مصدقين ، ومفكرنى مزودها ،

[The DeViL]

واضح يا عمرو ان نضارتك خدعتك المرة دى ( دة مش قسم ضحكتك بالدنيا و ربنا )

[dina_m7]

اقتباس من رد عمرو
وهتلاحظ أن كثير ما يتحدثون على النت يمجدون أو يرسمون شخصيات حتى لو سألت نفسك فى يوم بتقول على النت ده كله حوارات فعشان كده بقلكم متحكموش على شخصية عن طريق النت ولا حتى بالكلام لأن مش شرط أن الكلام يمثل شخصية المتحدث ومش هو ده وليد حبيبى

اقتباس من رد وليد
قولهم يا حاج عمرو عشان مش مصدقين ، ومفكرنى مزودها

تعليقا على ردكم انتوا الاتنين
انا مش عارفه انت يا وليد فرحان كده ليه بكلام عمرو ده بيقول انك بترسم شخصيه مش شخصيتك وواضح انه عارفك شخصيا وبيقول انك مش بشكل اللى احنا فهمينه طيب لو كده ملقتش غير الشخصيه المعقده نفسيا دى اللى ترسمهالنا
عامه احنا كنا فاكرين ان دى شخصيتك وحبينا نساعدك وبس
وبالنسبه للردود انها كانت طويله فعشان كنا بنتناقش وده شيىء عادى مفهوش حاجه لا يستدعى الضحك ولا السخريه بمعنى اصح
وشكرا لمشاركتكم ف الموضوع

[waleed A.Hassan]

أولا ً : أشكرك على أتهامى بالكدب والنفاق بشكل لطيف ، بس على فكرة أنا مش بلومك لأنك بنيتى رأيك على خطأ ، فأكيد النتيجة بالنسبالك هتبقى خطأ ، وده لأنك حاولتى تلخصي شخصيتى من خلال ردودى على بعض المواضيع ، ومعاكى حقك فى كده .. رغم أن أنا دخلت وقلت أن أنا مش مزودها ولا حاجة ، ألا أنك أصريتى أن أنا مزودها ،
ثانيا ً : أنا مش فرحان بكلام عمرو ولا حاجة – شكرا ً على ديه بردوه - وده لأن أنا على يقين أن عمرو ميقصدش كده ، وده طبعا ً لأنك حاولتى تفهمى رأيه من خلال كلامه المكتوب ، وأعتقد أنه كان يقصد أن من الصعب أن واحد ممكن يعرف التانى من خلال كلام مكتوب ع النت .. وده بيفتح الباب أن النت يكون مجال للحوارات والكلام ده ،
ثالثا ً : بفرض أن كلام عمرو صحيح ويقصد المعنى الحرفى لكل الكلام اللى هو كتبه .. أيه الشئ العظيم اللى أنا عملته علشان يخلينى أمجد من نفسى وأرسم شخصية مش شخصيتى ، بالعكس .. أنا واحد على يقين بأن أنا غلط وأعترفت بكده .. فلو كلام عمرو صحيح بالنسبالك ، كنت أفضل أنا أفتخر بصفات كويسة وأمجد من نفسى وأرسم شخصية كويسة فى نظركم ، أهو على الأقل أكون ظهرت بشكل كويس فى عيون أعضاء المنتدى .. أنما أنا بقول اللى أنا شايفه فيا ، ومتكلمتش غير فى الصفات اللى مش شايف أنها تجعلنى محل فخر بشخصيتى لدرجة أن أنا أطلع أكدب عليكوا ، أو أحور بأستخدام تعبير عمرو ،
رابعا ً : كل أنسان جواه كم من المشاكل والأفكار السلبية أو المشاعر المتناقضة ، هو أنسان مريض نفسى ، وللعلم أن كلنا مرضى نفسيين ، أنما كلمة معقد نفسى ديه أنا معرفش معناها ، ولو أنا كده .. مش هحاول أتهرب من الكلمة لأنى أعرف جيدا ً أن الكلمة لا تعنى أنى مجنون كما يعتقدها كثير من الجهلاء ،
خامسا ًً : يادينا فيه ناس بتعيش مع بعضها سنين ، ومش بتعرف بعضها.. عايزة أنتى تعرفى شخصية أنسان من خلال كلامه ع النت ، ومش معنى كده أن أنا كلامى غلط ، ربما أنا معرفتش أوصل كلامى بالضبط ، لأن مش من السهل أنك تنقلى فكرة عن طريق النت ... فمن المستحيل أنك تنقلى أحساس عن طريقه ،
سادسا ً : متنسيش أن فيه موضوع ليكى أتكلمنا فيه فى النقطة ديه ، وأتفقنا كلنا على أن كل أنسان ممكن يشوف التانى زى ماهو عايز يشوفه ، ربما أنا شايف نفسى بطريقة معينة ، وربما أنتى شايفانى مزودها شوية ، وربما عمرو ومروان مش شايفنى كده ،
سابعا ً : أشكر جميع من حاول أن يساعدنى فى الخروج من المود الزبالة اللى بعيش فيه ، وأحب أقولك أن أنا أول ماقريت كلامك زعلت جدا ً لكل الأتهامات اللى أتهمتينى بيها ، بس بعد كده وجدت أنك معاكى حق ، فى حدود اللى كنتى تعلميه وفهمتيه، رغم تسرعك فى الحكم ،
ثامنا ً : ياريت عمرو يدخل يعلق على كلامى لو كان فيه أى غلط من وجهة نظره ،
تاسعا ًً : أسف بشدة على التطويل ، وأتمنى أن وجهات نظرى تكون وصلت زى ما أنا عايز ،
وشكرا ً

[AMR ABD EL.HAKIM]

أولا: شكل الأخت دينا عايزة توقع مابينا بس أعتقد ده مستحيل .
ربما ألى قرأكلامى يفهم زى دينا لأن محديش يعرف علاقتى بوليد ولأنى عارف أن وليد عمره ماكان هيفكر بالطريقة دى أتشجعت أنى أكتب ردى أنا كنت بتكلم بشكل عام ولما أتكلمت بشكل خاص حددت أن وليد مش كده لأنى أنا عارف العلومنجية المثقفين بيحبوا الدقة وواحد +واحد =2بس ثانيا أن مش بسخر ولا حاجة من الموضوع لأن الموضوع لو يدعو إلى السخرية أنا مكنتش علقت وتركت رد .
ولو كنا بنتكلم يا جماعة فى المنتدى فى أى موضوعا كان فده من عشمنا فى أصحبنا مش عشان نزعل من بعض أو غيره لأن أعتقد الحكاية كلها أهيف من أننا نحتاز فى كلمنا

[dina_m7]

ردا على وليد انا اسفه مقدما على التطويل
محور كلامك كله بيقول ان انا كنت فاهمه شخصيتك غلط خالص
اولا انا لو كنت واخده عنك فكرة غلط كنت المفروض انك تقولى انتى فاهمه غلط مش تقول ححاول اغيير من نفسى وتشكرنا على كلامنا ليك وكمان ماهو كان كل الاعضاء بيقولك انك مش كده ومصعب كل حاجه على نفسك والحياه ابسط من كده وكان من ضمنهم رد ديفل لدرجه انك قولتله ماكنت قولت اكلنا ايه النهارده يعنى كلامه مكنش غلط ومكنتش معترض عليه واكيد انا جبت سيره ديفل عشان اوضح كلامى عشان الاخ عمرو ميفتكرش انى بوقع مابين اى حد
كنت موافق على كل الكلام ده ومقولتش اى حاجه تدل اننا فهمينك غلط يبقى ليه بتعترض دلوقتى ؟؟
ثانيا معتقدش ان لفظ انت فرحان بكلام عمرو كان فى اهانه ليك عشان تزعل منه
ثالثا كويس جدا انك توصلت لوحدك ان كان معايا حق ف كل كلامى

ردا على الاخ عمرو
اولا كويس انك عارف ان اللى حد كان حيقرا كلامك حيفهم اللى انا فهمته وده معناه ان التوقيع مش مقصود (مش عشان تصلح كلامك ادام صاحبك تغلط ناس تانيه )
ثانيا انا عارفه ان الموضوع طبعا لا يدعو لاى سخريه بس انت كنت بتسخر من الردود الطويله وانا وضحتلك السبب مش من الموضوع نفسه (حضرتك فهمت ردى غلط )
اخيرا انا طبعا مكنش قصدى انى ازعل (او اوقع ) ما بين اى حد كل مافى الموضوع انى زعلت لما اكتشفت ان انا (او كلنا ) فاهمين شخصيه وليد غلط وهو موضحش ده خالص وكان مكمل معانا ف الحوار عادى جدا ولا اكن فى اى حاجه غلط
وانا اسفه جدا على طريقه كلامى لو كانت مش لطيفه رغم انى مغلطتش ف اى حد وكنت بتكلم صح
وشكرا

[AMR ABD EL.HAKIM]

أنا كنت بتكلم عموما ثم مفيش حد من أصحابى وخاصة وليد ومروان من الناس الموجدين معانا فى المنتدى أنى أوجه له كلام عن طريق منتدى أو غيره هو فى وشى أكثر من 7 ساعات تقريبا يوميا يعنى مش مستنى أنى أنقض أو أجمال عن طريق موضوع فى منتدى أو أصلح كلامى أمام أصحابى بدليل أنى لما أتكلمت وليد رد عليه وقال ...قولهم عشان هما مفكرنى مزودها ....يعنى هو مفهمهاش غلط لأنى أنا واضح الصح هقولوا أنه صح والغلط هقولوا غلط .
ثم عايز أوصلك حاجة يادينا قد يكون وليد معقد أو مكتأب أو ....قد يكون سعيد بهذا المود الله أعلم زى ماناس بتبقى سعيدة بمود التفاهه أو مود حب أو مود أمل أو سعيده أو غيره ومتتأسفيش يا دينا على حاجة مفيش حاجة و أكيد أنكم عارفين الأختلاف فى الرأى لا يفسد من الود قضية و أنا ببدأ المصالحة وأفتح قلبى ليكم و أقولكم <<<أحبكم فى الله >>>و إذا كان الواحد ميفضفضش مع أصحابه هيفضفض مع مين ومستنى ردودكم فى المصالحة و أرجوكم محدش يتكلم فى الموضوع ده تانى وأتمنى أنكم تحترموا رغبتى تحياتى .

[waleed A.Hassan]

من غير أسف مرة تانية يا دينا ،
وأنا لو هرد على أولا ً وثانيا ً وثالثا ً اللى كتبتيهم .. هنزدودوا فى الموضوع على الفاضى وهو مش ناقص ، بس أحب أقولك أن أنا ولا زعلت ولا حاجة ، وأهو الواحد بكده يبقى بيطبق أحد صفات الشخصية المغناطيسية ،
شكرا ً ليكم كلكم ،

[dina_m7]

خلاص يا جماعه عامه حصل خير
وعلى راى عمرو الاختلاف ف الراى لا يفسد للود قضيه
وكويس يا وليد انك طبقت حاجه من الموضوع
وياريت ميكونش حد زعلان منى او اكون سببت زعل بين اى حد من غير قصد لاننا اولا واخيرا زمايل واخوات وربنا يوفقنا كلنا

[jellly]

no comment..... iam out of here...